برجك اليوم الجمعة 18 أغسطس 2017

حظك اليوم الجمعة 18 أغسطس 2017 مع عبدالله أحمد

حظك اليوم الجمعة 18 أغسطس 2017

إعرف حظك اليوم برج الحمل الجمعة 18 أغسطس 2017 عبدالله أحمد..

الحمل: من 21 مارس إلى 20 ابريل

برج الحمل عاطفياً:

اللي بيحب حد بيروح يقوله..مش يعمل عبيط ويتفرج على الحياة بتعدي من قدامه ويعملها باي باي..دي حاجة عيب والله

برج الحمل عملياً:

متركزش مع اللي بيحصل حواليك النهاردة اوي..طنش حبة وكبر دماغك خصوصا بالنهار..بالليل كل حاجة هتبقى اجمل واروق بمراحل وساعتها مهم تستغل الفرصة وتنبسط

برج الحمل صحياً:

ضحكتك منورة وشك ف المراية ولا لأا...إتأكد كدة

إعرف توافق برج الحمل مع باقي الأبراج النهاردة

متوافق مع الكبرياء بشكل كبير

*****************************************************************************

إعرف حظك اليوم برج الثور الجمعة 18 أغسطس 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

حب ف الطريق اليك..إستر يارب

برج الثور عملياً:

متخافش كل حاجة هتبقى كويسة ان شاء الله..إتطمن

برج الثور صحياً:

تخرج بالليل وتندنش وتفرفش وتبعد عن اي نكد ومتردش على اي مكالمات او نمر متوقع من اصحابها اي نكد او جدال او نقاشات مضنية وغير مجدية بالمرة واللي عاوز يزعل يتفلق..النهاردة اجازة من النكد

إعرف توافق برج الثور مع باقي الأبراج النهاردة:

متوافق مع الرغبة ف الجلوس على سحابة فوق لوحدك

*****************************************************************************

إعرف حظك اليوم برج الجوزاء الجمعة 18 أغسطس 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

طالما بتحب وبتتحب يبقى من حقك تعمل اي مصيبة براحتك النهاردة

برج الجوزاء عملياً:

لو اتفقست وانتا بتعمل مصيبة من مصايبك متخافش..إعمل نفسك مش فاكر اي حاجة..إنكر كل حاجة..كل حاجة

برج الجوزاء صحياً:

طالما تقدر وانتا واقف توطي وتلمس صوابع رجلك وتهرش فيهم من غير ما تتني ركبك يبقى كل حاجة ف الاوكيه

تعرف على توافق برج الجوزاء مع باقي الأبراج النهاردة:

متوافق مع البراح والحرية

*****************************************************************************

إعرف حظك اليوم برج السرطان الجمعة 18 أغسطس 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

كنت ظالم حد بتسرعك ف الحكم كالعادة ومحسس نفسك انك ضحية الظروف والزمن والحياة وقاعد تندب..مش مهم..المهم انك عرفت وهتاخد بالك وهتعاملهم كويس لأنهم يستاهلوا دة منك..مش كدة ولا ايه؟

برج السرطان عملياً:

مهم تركز ف الشغل حتى النهاردة..الحياة عاوزة صحصحة اليومين دول عشان في مصلحة كويسة او ترقية محتملة ممكن تحصلك لو اهتميت اليومين دول..اهم حاجة متكسلش

برج السرطان صحياً:

الفطار النهاردة مهم جدا يكون متنوع ومعمول بحب واهتمام

تعرف على توافق برج السرطان مع باقي الأبراج النهاردة:

متوافق مع ملمس القطيفة

*****************************************************************************

إعرف حظك اليوم برج الأسد الجمعة 18 أغسطس 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

شعرك جميل النهاردة ماشاء الله

برج الأسد عملياً:

متزعلش على حاجة النهاردة..الفرصة اللي بتروح بييجي مليون فرصة غيرها ولا تضايق نفسك

برج الأسد صحياً:

إتطمن انتا زي الفل..متاكلش أكل مسبك النهاردة و إبعد عن الفول والرنجة والفسيخ وانتا تبقى زي الفل

تعرف على توافق برج الأسد مع باقي الأبراج النهاردة:

متوافق مع الرغبة ف صبغ شعرك

*****************************************************************************

إعرف حظك اليوم برج العذراء الجمعة 18 أغسطس 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

عشان تنبسط بالحب لازم الاول تحب وتتحب مش توهم نفسك بحالة حب وخلاص..عقلك ممكن تضحك عليه انما قلبك لأ..إنسى

برج العذراء عملياً:

اللجوء للعنف مبيحلش اي حاجة النهاردة..آجله حبة معلش وفخخ ولغم الاعداء من تحت لتحت

برج العذراء صحياً:

القراية مفيدة للمخ والمزاج وبتعملك دماغ حلوة ولطيفة طبعا بس مهم تهتم بالأكل برضة جنبها النهاردة وابعد عن التلفزيون خالص ياريت

تعرف على توافق برج العذراء مع باقي الأبراج النهاردة:

متوافق مع الابراج المائية والترابية والسنجابية

*****************************************************************************

إعرف حظك اليوم برج الميزان الجمعة 18 أغسطس 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

بلاش تناحة عاطفية النهاردة على قلبك..من حقه ياخد اجازة يوم عادي خالص

برج الميزان عملياً:

متركزش بزيادة ف تفاصيل الواقع المحيط النهاردة..إعتبر نفسك ف فيلم كارتون..صدقني هتنبسط

برج الميزان صحياً:

متحاولش تسحل نفسك ف اي ذكريات فاتت وركز ف النهاردة وبس..اليوم مناسب للطبيخ وللاهتمام بالضحك وبس

تعرف على توافق برج الميزان مع باقي الأبراج النهاردة:

متوافق مع الضحك البرئ

*****************************************************************************

إعرف حظك اليوم برج العقرب الجمعة 18 أغسطس 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

بقيت بتنسى تفاصيل كتير الايام اللي فاتت دي..كله من الرطوبة هي السبب

برج العقرب عملياً:

المود النهاردة جوة دماغك محتاج شوية تغيير ف روتين اليوم حبة..شوف حابب تغير تعمل ايه بالظبط واعمله..اهم حاجة متردش كل كلمة بكلمتها واقدر على نفسك حبة

برج العقرب صحياً:

صحتك محتاج اهتمام النهاردة ومحتاج حركة ونشاط شوية..شوف اي حاجة متأجلة من اللي وراك وخلصها النهاردة وبلاش خناق خالص عشان اليوم والجو مش مناسبين لأي شكل من اي نوع

تعرف على توافق برج العقرب مع باقي الأبراج النهاردة:

متوافق مع الابراج الهوائية والمائية

*****************************************************************************

إعرف حظك اليوم برج القوس الجمعة 18 أغسطس 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

متستحلفش لحد..مسير الملوخية تيجي تحت المخرطة من نفسها

برج القوس عملياً:

اقعد النهاردة واتفرج على القدر وهو بيلاعب اعدائك بشكل اوتوماتيك وإضحك ف الخباثة

برج القوس صحياً:

من حقك تبوظ الدايت النهاردة لو عامل دايت ومن حقك تعمل دايت لو مبتعملش دايت

تعرف على توافق برج القوس مع باقي الأبراج النهاردة:

متوافق مع الرغبة ف الحب

*****************************************************************************

إعرف حظك اليوم برج الجدي الجمعة 18 أغسطس 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

متنكدش على حبيبك عشان انتا مزاجك مش حلو..هو مالوش ذنب حرام عليك..إلا لو هو السبب..ساعتها يستاهل بقى اللي يجراله

برج الجدي عملياً:

المزاج محتاج خروج آمن من قوقعة النكد بشكل عاجل..مش مجرد خروج من البيت وبس

برج الجدي صحياً:

حاول تشوف قهوة تركن فيها كدة بالليل ولا حاجة تتفرج على اللي رايح واللي جاي وتحقد ع الناس براحتك وتلوم الحياة والناس على مودك الوحش

تعرف على توافق برج الجدي مع باقي الأبراج النهاردة:

متوافق مع الرغبة ف الندب

*****************************************************************************

إعرف حظك اليوم برج الدلو الجمعة 18 أغسطس 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

إجهز عشان هتقابل حد بتحبه النهاردة ف الحلم زي إمبارح..يابختك

برج الدلو عملياً:

عمال تورّ بقالك حبة محدش عارف ليه..إهمد وريح دماغك وجسمك حبة النهاردة وريلاكس وبلاش خايلة كدابة

برج الدلو صحياً:

محتاج تعدل طاسة دماغك بمزيكا حلوة وجبنة ريكفور ومساج ف الحلم وهتبقى زي الفل

تعرف على توافق برج الدلو مع باقي الأبراج النهاردة:

متوافق مع الرغبة ف الحب..ياحنين

*****************************************************************************

إعرف حظك اليوم برج الحوت الجمعة 18 أغسطس 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

إحساسك ان ناس كتير مستنية تصرفاتك وكلامك عاملك قلق..طنش وكبر دماغك

برج الحوت عملياً:

حاول تتعامل كأن مفيش حد حواليك وفضي دماغك..جرب انتا مش هتخسر حاجة

برج الحوت صحياً:

كل ماحافظت على دماغك فاضية النهاردة كل ما هتنبسط وصحتك هتبقى كويسة ومستقرة..شعار اليوم طنش تعيش وتاكل وتسقي ف قراقيش

تعرف على توافق برج الحوت مع باقي الأبراج النهاردة:

متوافق مع الدماغ الرايقة الفاضية وبس

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.